အများသူငါများက လူပျိုကြီးများအကြောင်း မေးမြန်းကြသည် လူတစ်ကာထက်ထူးခြားနေသောကြောင့် အဘယ့်ကြောင့် ထူးခြားနေသနည်းဟု သိလိုကြသည်။ အောက်ပါ ဝက်ဆိုက်တွင် အဆိုပါ အချက်အလက်များကို ဖော်ပြထားခြင်းကို တွေ့ရှိရသည် သိလိုလူများသွားရောက် ဖတ်ရှု့ကြပါရန်။ လူပျိုကြီးများ လာရောက်ဖတ်ရှု့ပါက မိမိနှင့် မည်၍မည်မျအကျိုးအကြောင်း တိုက်ဆိုင်ကြောင်း ဆန်းစစ်ပါလေ။ (မှတ်ချက်။ ။ ဘယ်သူရေးမှန်းမသိပါ မောင်ပြုံးပြောသဖြင့် ဖတ်ကြည့်မိခြင်းဖြစ်သည်။)

လူပျိုကြီးစစ်

From www.ourmandalay.net

မနက်မိုးလင်း အိပ်ရာထ စားစရာကြည့်ပြန်ပါလျင် ကြက်ဥပြုတ် ပေါင်မုန့် အလဲအလှယ်မရှိ ဒါတွေစားရမည့်အစား လမ်းထိပ်က မုန့်ပစ်သလက်နဲ့ အကြော်စုံကိုသာပဲ စားချင်တော့၏။ မုန့်တီဖတ် တစ်ဖတ်နှစ်ဖတ် အပိုပါသွားသဖြင့် ပြန်ပြန်နှုတ်လေ့ရှိသော မုန့်တီသည်မဆီမှာသာ အသားနည်းပြီး ပဲမှုန်များနေသော မုန့်တီသုတ်သာ စားချင်တော့၏။ အလေးခိုးလေ့ရှိသော ပဲပြုတ်သည်အဒေါ်ကြီးထံမှ ပဲပြုတ်ဖြင့်သာ နနွင့်ထည့်ကြော်သော ထမင်းကြော်ဝါဝါလေးသာ စားလိုတော့သည် စီးတီးဟောမှ ရေခဲသေတ္တာထဲမှ ပဲပြုတ်ခပ်ကြမ်းကြမ်းများကို ငါမမြင်လိုတော့ပြီ။

အချိန်တန်လျင် ကျောင်းဆိုသောအရပ်သို့ ငါသွားရပြန်သည် အဆောက်အဦးများ ကြီးမား၏ နည်းပညာများ ဆန်းပြား၏ဟု ဆိုကြသည်။ သို့သော် လမ်းမခင်းရသေးအဖြင့် မြေလမ်းဖြင့်ဝင်ခဲ့ရသည့် ငါ့ကျောင်းကိုသာ အောက်မေ့မိ၏ ဂိုဒေါင်သာသာ အဆောင်ကလေးများဖြင့် စာသင်ခန်းများကိုသာ တမ်းတမိသေး၏။ လေအေးပေးစက်ကြောင့် ချမ်းလွန်းသည့် စာသင်ခန်းသို့ရောက်သော်လည်း မီးမလာသဖြင့် ပန်ကာမလည်၍ စာအုပ်ဖြင့်ယပ်တောင် ခပ်ကာသင်ခဲ့ရသည့် စာသင်ခန်းကို သတိရမိသေးသည် တမ်းတမိသေး၏။

ကန်တင်းဆိုသော အရပ်မှာကား အမြဲလူစည်ကား၏ အရာရာတန်းစီမှရသော အရပ်ပေတကား ပုံစံခွက်ထဲမှ ထုတ်သကဲ့သို့သော ဟင်းပေါင်းစုံကို တွေ့နိုင်သည် အမြင်သာကွဲမည် အဆင်သာကွဲမည် နေရာသာကွဲမည် မည်သည့်နေရာစားစား အနံအရသာ မကွဲပြားပါလေ။ ငါ့၏ ဗမာပါးစပ်နှင့် အခက်တွေ့လှသည် ချဥ်ချဥ်ငံငံစပ်စပ်စားလိုလှသည် ယခင်ကျောင်းတက်ခဲ့စဥ်က စားခဲ့ဖူးသော တစ်ခုတည်းသော ကန်တင်းမှ လက်ဘက်ထမင်းကိုသာ တန်းမစီပဲ လုကာယက်ကာ စားချင်တော့၏ ဟင်းမကောင်းသော်လည်း အမေထည့်ပေးလိုက်သော ခရမ်းချဥ်သီးငါးပိချက်၊ သရက်ကင်းနှင့် ကြက်ဥကြော်ကိုသာ စားချင်တော့၏။

အလုပ်စားပွဲတစ်နေ့ဝင် တစ်နေ့ထွက် မပြောင်းလဲသောအလုပ် တစ်ချောက်ချောက်နှင့် ၁၀၂ လုံးသော ခလုတ်ဖြင့်သာ အချိန်ကုန်ရသည်။ ပါတ်ဝန်းကျင်မှလူအများကို ကြည့်မိသည် စကားပြောခြင်း အတတ်ပညာပင် ကုန်ဆုံးသွားလေသလော အလုပ်စားပွဲချင်း ကပ်လျက်လူများပင် ပြောစရာရှိသော အကြောင်းများကို ခလုပ်နှိပ်သာ ပြောတတ်ကြတော့၏။ ငါ့၏ စိတ်ဖြင့်တော့ မကိုက်ပါလေ ရယ်ရယ်မောမော ဆူဆူညံညံ အလုပ်လုပ်ခဲ့ချိန်ကိုသာ သတိရမိသည် အချိန်တန်လျင် လက်ဘက်ရည်သောက် နားမည်ဟေ့ဆိုပြီး အလုပ်လုပ်ဖော်လုပ်ဖက်များ အလာပသလာပ ပြောချိန်ကိုသာ အမှတ်ရမိတော့၏။ နင်ကော်ဖီတစ်ခွက် ငါလက်ဘက်ရည်တစ်ခွက် ပါဆယ်ဆွဲခဲ့ လမ်းသွားရင်း သောက်မည်ဆိုသော လုပ်ဖော်ကိုင်ဖက်များကား ငါ့ဇရိုက်နှင့်မကိုက်လေပြီ။

အချိန်လည်း ကုန်ဆုံးခဲ့၍ လင်းနေဆဲအလင်းတုက သန်းခေါင်ရောက်ပြီဟု ညှန်ပြ၏ ငါ့၏အလွမ်းနာကလည်း အရှိန်မြင့်လာခဲ့သည် ငါ့၏ခန္တာမှာ ၁၅ ပေပါတ်လည် အခန်းကျဥ်းတွင် အကျဥ်းကျဆဲပါတစ်ကား သို့သော်လည်း ဖြစ်နိုင်လျင် စိတ်အလျင်ကို မွေးမြေသို့သာ စေလှတ်လိုတော့၏။

(ငယ်စဥ်က ဖတ်ဖူးသော အလွမ်းနာဆိုသော အက်ဆေးကို ပြန်လည်စဥ်းစား၍ မှီငြမ်းကာရေးသည် သို့သော် စာအရေးအသားမှာကား ခြေဖျားပင်မမှီပါလေ စာရေးများစွာ လေ့ကျင့်ရဦးမည် ဖြစ်သည်။)

ဘလော့အသစ်ကို လာရောက်လည်ပါတ်ကြသော ဘလော့မိတ်ဆွေများကို ကြိုဆိုပါသည်ခင်ဗျာ။ မှန်မှန်ရေးနိုင်အောင်လည်း ကြိုးစားပါဦးမည်။ အဘယ့်ကြောင့် နာမည်ပြောင်းပါသနည်းဟု မေးခဲ့သည်ရှိသော် မမဆင်ပြောသကဲ့သို့ ဘုံဆိုင်နာမည် ဖြစ်နေသောကြောင့် ဖြစ်ပါသည်။ အိမ်ထောင်ကျသွားသဖြင့် နာမည်ပြောင်းသလားဟု အထင်တကြီးမေးမည့်သူများကိုလည်း ကြိုတင်ကာငြင်းလိုပါသည် မဟုတ်မမှန်သော ကောလဟာလသတင်းများဖြစ်သည်။

နည်းနည်းလေးအားတာနဲ့ နည်းနည်းတော့ တောင်လုပ်မြောက်လုပ်ပေါ့။ WordPress ကို Blogger ကိုပြောင်းကြည့်ချင်ပြန်တယ်။ Blogger ကနေ WordPress ပြောင်းတာက ဘာမှလုပ်စရာမလိုဘူး WordPress မှာက Blogger Export Format ကို Import လုပ်လို့ရပါတယ်။ WordPress ကနေ Blogger ပြောင်းရင်သာ ဇာတ်လမ်းရှုပ်တာ။ Export XML တွေကိုကြည့်လိုက်တော့ Schema တွေကို Transform လုပ်ရင်တော့ ရတယ်ဆိုတာ တွေ့တယ်။ ကိုယ့်နည်းကိုယ့်ဟန်နဲ့ ပြောင်းလိုက်တော့ WordPress Export Format ကနေ Blogger Export Format ဖြစ်သွားရော။ သူများရေးထားတာလဲ ရှိချင်ရှိမှာပါလေဆိုပြီး လိုက်ရှာတော့ တစ်ခုတော့တွေ့သဗျ

http://code.google.com/p/google-blog-converters-appengine/

ဆိုပြီးတစ်ခုတွေ့တယ်။ သူ့ဟာကတော့ ရေးထားတာ ကြာပြီဆိုတော့ ကိုယ့်ဟာကိုယ် ပြောင်းလိုက်တာထက် ပိုကောင်းတယ်။ ဘာလို့လဲဆိုတော့ ကိုယ့်ဟာကိုယ် ပြောင်းလိုက်တာက အထဲက Link တွေရယ် Youtube video တွေရယ် နည်းနည်း ပြဿနာကျန်ခဲ့တယ်။ Google-Blog-Converters-Appengine မှာကတော့ WordPress တင်မကဘူး livejournal, movabletype, typepad ကနေ Blogger ပြောင်းတာလည်းပါတယ်။ သုံးတာကတော့ Source ကိုဒေါင်းပြီးတော့ Command line ကနေ Run လိုက်ရင်ပြောင်းတယ်။ အဲဒါတွေမှ ရှုပ်တယ်ဆိုလည်း appspot မှာတင်ထားပေးတာရှိတယ်။

http://blogger2wordpress.appspot.com/
http://wordpress2blogger.appspot.com/
http://livejournal2blogger.appspot.com/

အဲဒီမှာတွေကတော့ Web Interface နဲ့တင်ထားပေးတယ် ကိုယ်ပြောင်းချင်တဲ့ Export ကိုသာပေးလိုက် Transform လုပ်ပြီးသားထွက်လာရောပဲ။ သူတို့မှာလည်း သူတို့ပြဿနာနဲ့သူ File Size 1MB ကျော်ရင် မရပြန်ဘူး။ ဗမာဘလော့ကလည်း မကျော်တာမရှိလောက်ပါဘူး အနည်းဆုံးတော့ အင်္ဂလိပ်ဘလော့ထက်တော့ နှစ်ဆများတယ်။ လုပ်တတ်ရင်တော့ သူ့တို့ရေးထားတဲ့ Script ကိုယူပြီး ပြောင်းလိုက်တာပဲ အဆင်ပြေပါတယ်။ ဒါမှမဟုတ်ရင်တော့ Export File ကို နှစ်ခုသုံးခု ခွဲလည်းရတယ် External Schema ကိုဒီအတိုင်းထားပြီး Content လေးတွေပဲ ပြောင်းထည့်လိုက်ပြီး File Size ကိုသေးအောင် လုပ်လိုက်ရင်ရတာပါပဲ။ အဲဒီလိုအကြံအဖန်နဲ့လည်း စမ်းကြည့်လိုက်တော့ အဆင်ပြေပါတယ်။ ဟိုပြောင်းသည်ပြောင်း ပြောင်းချင်သူများအတွက် စမ်းကြည့်လိုက် အဆင်ပြေမယ်ထင်ပါတယ်။ အလုပ်ရှုပ်သက်သာအောင် Blogger ကိုတော့ပြောင်းလိုက်ချင်တယ် ဒါပေမယ့် ကိုယ့်ခြေကိုယ့်လက် WordPress ကိုလည်းသုံးချင်ပြန်တယ် WordPress ကိုနည်းနည်း စိတ်ညစ်တာက Upgrade ရယ် Hosting အပြောင်းအရှေ့ရယ် Free Hosing တွေရဲ့ Service Down တဲ့ဟာတွေပဲ။ Blogger သမားများ WordPress ပြောင်းကြည့် WordPress သမားများ Blogger ပြောင်းကြည့်ကြပါဦးလား။

Word ဖြင့်စာရိုက်ရသည်တွင် Algorithm များ Equation များ Mathematical Notation များကို Word ဖြင့်ရိုက်ရသည်လောက် စိတ်ပျက်စရာကောင်းသည့် အရာမရှိပါ။ Equation များ Mathematical Notation ကို Equation Editor ကိုစိတ်ရှည်လက်ရှည် မောက်ဖြင့်နှိပ်လျင် ထွက်လာပါသော်လည်း Algorithm များကို မြန်ဆန်စွာရိုက်ရန် နည်းမတွေ့သေးပါ။ သို့အတွက်ကြောင့် LaTeX မှာ သာမန်စာရိုက်သော လူများအတွက် မသုံးမတည့်သော်လည်း မည်သည့်အခါမှ သင်္ချာနှင့်ဆက်နွယ်သော စာရေးခြင်းများတွင် ပျောက်ကွယ်မည်မဟုတ်ချေ။ algorithm2e ကိုသုံးလိုက်

\begin{algorithm}[H]
\KwIn{Set of File $Files$}
\KwOut{File}
\ForEach{File $f$ in $Files$}{
Append to $F$;
}
Return $F$;
}
\end{algorithm}

လို့ရေးလိုက်လို့

Input: Set of File
Output: File
foreach File f in Files do
Append to F;
end

ဒါမျိုးလေး Indent တွေ Bold, Italic တွေနဲ့ ကျကျနနပေါ်နေမှတော့ Word မှာဘာကိစ္စ မောက်နဲ့ ကလစ်ကလစ်အိုကေတွေ အခါသုံးလေးဆယ်လောက် နှိပ်နေရတာဘာအသုံးကျသလဲ။ Algorithm ကိုရိုက်တတ်ဖို့ Program ရေးတတ်ရမယ်ဆိုတာလည်း ဟုတ်သေးပါဘူးလေ မအားလို့ သူများအငှားရိုက်ခိုင်းချင်ရင် ရိုက်ခိုင်းမရပြန်ဘူး။ ကိုယ့်ဟာကိုယ်ရိုက်တာပဲ အေးပါတယ် ပိုက်ဆံကုန်သက်သာတယ်။

လာပြန်ပြီခင်ဗျ တဂ်ဆိုရင်ကို မျက်ခုံးလှုပ်နေတာပါ မအားတာကလည်း တစ်ကြောင်း။ သို့သော်လည်း ဒီတစ်ခါက Template နဲ့လာတဲ့ Tag ခင်ဗျ သူကအဆင့်မြင့်တယ် ဆာဗေးများ ကောက်နေသလား ထင်ရတယ်။

တွေးနေမိတာက . . . . အနာဂတ်

ကိုယ့်ကိုယ်ကို ပြန်ဆင်ခြင်မိတာက . . . . ငပေါကြီး

ကျန်းမာရေး . . . . တစ်နေ့ရှေတစ်နေ့ငွေပါပဲလေ

ဖတ်ဖြစ်တဲ့ စာအုပ် . . . . အသက်အရွယ်နဲ့ လိုက်အောင် “မောင်ခွေးဖို့ ကဗျာများ”

ရောက်နေဖြစ်တာက . . . . ပစ္စုပ္ပန်

ရေးဖြစ်နေတာက . . . . ခဲတံနဲ့များပါတယ် ဘောပင်နဲ့သိပ်မရေးဖြစ်ဘူး

နားထောင်ဖြစ်နေတာ . . . . အခုတစ်လောတော့ သူများအတင်းပြောတာ နားထောင်နေရတယ်

ရွတ်မိနေတဲ့ကဗျာ . . . . ဝါဆိုဝါခေါင် ရေတွေကြီးလို့ သပြေသီးမှည့် ကောက်စို့ကွယ်

ဖြစ်ချင်နေတာက . . . . နှစ်ရက်ပဲ ရုံးဖွင့် ငါးရက် အလုပ်ပိတ် ခွင့်ယူ လစာမလျော့

စားဖြစ်နေတာက. . . . ပန်းကန်နဲ့စားတယ် ကုလားဆိုင်ဆိုရင်တော့ တစ်ခါတစ်လေ ငှက်ပျောဖက်နဲ့ပေါ့

သနားနေမိတာက . . . . ငါတော်တော် သနားစရာကောင်းပါလား

လွမ်းနေမိတာက . . . . မွေးမြေရပ်ကို အမြန်ရထားဆိုက်ရောက်ချိန်

မေ့လျော့နေတာ . . . . မေ့နေပါတယ်ဆို ဘယ်မှတ်မိပါ့မလဲ

တမ်းတနေမိတာ . . . . အမေချက်ကွေးတဲ့ထမင်းနဲ့ဟင်း

ကြိတ်ပြီး ချီးကျူးနေမိတာ . . . . ကြိတ်ပြီးတော့ချီးကျူးပါတယ်ဆို ချရေးလို့ ဘယ်ဖြစ်မလဲ

ကြိတ်ပြီး အထင်သေးနေမိတာ . . . . ငါတော်တော်ည့သေးပါလားနော်

ဆန္ဒမရှိတဲ့နေရာ . . . . ဆန္ဒမရှိမှတော့ အသက်မရှိတော့ပါဘူးလေ အနည်းဆုံးတော့ အသက်ရှင်ဖို့ ဆန္ဒရှိရမယ်

ဆန္ဒရှိနေတဲ့ ကိစ္စ . . . . လုပ်ချင်တာတွေ မကုန်သ၍တော့ အသက်ဆက်ရှင်ချင်တယ်

ချစ်နေတာက . . . . မိမိကိုယ်သာ အချစ်ဆုံးဆိုတာ အမှန်ဆုံးပဲ

စိတ်ပျက်နေမိတာက . . . . အချိန်ဆွဲတတ်တဲ့အကျင့်

စွဲလန်းနေတာက . . . . စွဲလန်းနေရင် သံသရာရှည်တယ် ဘာတစ်ခုမှ မစွဲလန်းအောင်နေသည်

လိုအပ်နေတာက . . . . . အချိန်

တောင်းတနေမိတဲ့ဆု . . . . စိတ်ဖိစီးမှု့တွေ လျော့ချင်တယ်

ထပ်ပြန်တလဲလဲ အော်ဟစ်နေမိတာက . . . . တစ်ခါမှ အော်ဖူးပါဘူး

ဝန်ခံချင်တာ . . . .ရေးထားတာတွေကို ချင့်ချိန်ပြီးယုံပါ

အလုပ်ကလည်း လခက ကံဆိုးချင်တော့ နောက်ကျပြီး အခုထက်ထိ မရသေး အဲဒါကိုမှန်းမထားတော့ အမေကဟိုတစ်လောက ပိုက်ဆံလိုသေးလားဆိုတော့ အလုပ်လုပ်နေတာပဲ မလိုဘူးပြောလိုက်တယ် ကျောင်းဖွင့်တော့ ကျန်းမာရေးအာမခံတွေ မူပိုင်ခွင့်ဖိုးတွေ အတွက်ရှိတဲ့ လက်ကျန်နဲ့ ကြိုပြီးပေးလိုက်တာ ပြဿနာတက်တာပဲ အခုတော့စားစရာက ဟိုဘက်ဘဏ်မှာ ၁ဝ သည်ဘက်ဘဏ်မှာ ၁၁ ကျပ်ကျန်တယ် အဲဒါကလည်း ထုတ်မရလို့ ကျော်မကောင်းကြားမကောင်း ၁ဝ အွန်လိုင်းကနေ ဟိုဘက်သည်ဘက် လှဲလိုက်မှ ၂ဝ ပြည့်လို့ ATM မှာထုတ်လို့ရသွားတယ် အဲဒါလည်း စားစရာစျေးဝယ်လိုက်တာ ကုန်ပါရောလား။

ကိုဒီဘီအိမ်က ဆွမ်းကွေးကိုသွားဖို့ MRT ဖိုးတောင်အသွားပဲရှိတယ် အပြန်ဖိုးမရှိလို့ မလာတော့ဘူးလုပ်နေတာ ကိုသာသာက ဟာဗျာ ကျွန်တော် ပါနေတာ ဒါအတွက်နဲ့တော့ မလာပဲမနေပါနဲ့ဆိုလို့ သူ့ကျေးဇူးနဲ့ ကိုဒီဘီအိမ်က ဆွမ်းကွေးကိုသွားစားရတယ် စားရတဲ့ထမင်းထဲမှာ ငတ်နေတဲ့အချိန်လို့ ပြောရမယ့်အချိန်မှာ စားရတဲ့အတွက် အင်မတန်ကျေးဇူးတင်ပါတယ်။ ကိုသာသာကိုတော့ ဘယ်လိုကျေးဇူးတင်ရမှန်းကို မသိတော့ပါဘူး။ ကိုသာသာရဲ့ စရိတ်နဲ့ ထမင်းစားလာရတယ်လို့ ပြောရမယ်ထင်တယ်။

ဆွမ်းကွေးမှာလည်း မမဆင်က ရေဘူးလာသိမ်းရင်း ရယ်ပြတယ်တဲ့ မြင်ဘူးလေ နှစ်ရက်လောက် မအိပ်ရသေးတော့ လူကလည်း ဝါးတားတား ဖြစ်နေပြီး ငိုက်ချင်နေတာပါ အဲဒါကိုသူလည်းမသိဘူးလေ ဒါနဲ့ လူမှု့ရေးနားမလည်ဘူး အပြောခံလိုက်ရသေးတယ်။ ကိုဒီဘီဆီလာတဲ့ ဧည့်သည်နှစ်ယောက်ကတော့ လူပျိုကြီးဆိုပြီး မိတ်ဆက်လိုက်တာနဲ့ ကြောက်များသွားကြလားမသိဘူး မကြာပါဘူး ပြန်ပြေးကြပါရောလား။ ဘာပဲပြောပြော ရခိုင်ဟင်းတွေနဲ့ အပြီစားခဲ့ရတာပဲ သို့ပေမယ့် အိပ်ရေးတွေပျက်နေလို့ စားလို့မဝင်ဘူး စံချိန်တွေလည်း ကျသွားပါရောလား။

ပြန်မယ်လုပ်တော့ အိုက်ကီဒိုသင်တန်းက ဆရာဆီက SMS ဝင်လာပြန်ရော။ ကိုယ်ကလည်း ပိုက်ဆံကိစ္စနဲ့ လုံးပန်းနေရလို့ မအားတာနဲ့ မသွားနိုင်တာကကြာပြီလေ အလုပ်လုပ်နေရလို့ မအားဘူးလို့ ပြောထားတော့ သူကလည်း အလုပ်ပိတ်ရက်ဆိုပြီး မှတ်မှတ် ရရခေါ်ရှာတယ် If U missed Aikido training, good news Bukit Batok East CC is open 2morrow 10 Aug. Aikido training is as usual time. Do come n join us. Sensei လို့ဝင်လာပါရော။ မနက်ဖြန်တော့ သူ့ကိုအားနာလို့ရယ် ပြန်လည်းသွားသင့် နေတာရယ်ကြောင့် သွားရဦးမယ်။

ဒီညလည်း အိပ်တော့အိပ်ချင်တယ် ရေးထားတဲ့ Paper လေးကိုလည်း ပိုကောင်းအောင် ပြင်ချင်နေတော့ စောစောအိပ်ဖြစ်မယ် မထင်သေးပါဘူးလေ National Day ဆိုပြီး လူတိုင်းအားနေ ပျော်နေကြတဲ့အချိန် ကိုယ့်မှာပဲ စာတမ်းအတွက် နောက်ဆံတင်းနေတာရယ် မနက်ဖြန်ပြီးမှ စားစရာမကျန်ရင်တော့ ဘယ်လိုရှင်းရမလဲ စဥ်းစားပြီးရင်မောနေရတယ် လခစားလုပ်ပြီး လခမျော်ရတဲ့ အလုပ်တယ်တယ်ပြီး မကိုက်ပါဘူးဆိုတဲ့ ကိုသာသာပြောတဲ့စကား တယ်မှန်ပါလားနော်။

ယခုဘလော့ကို နာမည်ပြောင်းမည်ဟု အကြံဖြစ်နေသည်မှာ ကြာပြီဖြစ်ပါသည်။ သို့သော်လည်း အလုပ်ရှုပ်မည်က တစ်ကြောင်း မအားမလပ်ဖြစ်နေသည်က တစ်ကြောင်းကြောင့် မပြောင်းဖြစ်ပဲဖြစ်နေခဲ့ပါသည်။ မောင်စေတန်ကလည်း ဟိုတစ်လောကပြောသည် ဦးဂူဂဲကို လူပျိုကြီးဟု မေးလိုက်ရာ ထွက်လာသော အဖြေများမှာ ကြက်ခြေခတ် သုံးလုံးများလည်း ပါလာသဖြင့် မကောင်းဟုဆို၏။ မှန်ပါသည် ထိုသို့ဖြစ်နေသည်မှာ ကြာပြီဖြစ်ပါသည် သို့ကြောင့် နာမည်မပြောင်းပါက အနှီလူများနှင့် ကြာလျင်လူမှားတော့မည်ဖြစ်သည်။ ဤအချက်မှာ အရေးအကြီးဆုံးဖြစ်၏။

နောက်ထပ်အကြောင်းတစ်ခုမှာ ကိုဒီဘီဖြစ်သည်။ ထိုလူကြီးမှာ လူတစ်ယောက်တွေ့တိုင်း မိတ်ဆက်ပေးလျင် ဒါလူပျိုကြီးဟုသာ မိတ်ဆက်တော့သည် သို့ကြောင့် ကြာလျင် ရာသက်ပန် နာမည်တွင်တော့မည် ဖြစ်သည်။ နာမည်ကို မည်သို့ပင်ခေါ်ခေါ် ကိစ္စမရှိပါ စိတ်ထဲလည်း မည်သို့မှပင် မဖြစ်ပါ။ သို့သော် စကားများသော ကျွန်တော်နှင့် ထိုနာမည်ကား ပြဿနာတက်ပါသည် အမျိုးသမီးများနှင့်စကားပြောပါက ထိုအမျိုးသမီးများမှ နာမည်ကိုကြည့်ကာ ကြောက်ရွံ့ကြပါသည်။ ဤမျလောက် ပေါတောတောနေတတ်သော ကျွန်တော့်ကို နာမည်ကြောင့် ရွံ့နေခြင်းမဖြစ်စေသင့်ဟု ယူဆမိသည်။

သို့ကြောင့် နာမည်ပြောင်းပါတော့မည် လာရောက်ဖတ်ရှု့ကြသော စာဖတ်သူများနှင့် မလာပဲ RSS ဖြင့်ဖတ်ကြသောသူများလည်း ဖြစ်နိုင်မည်ဆိုပါက နာမည်ကို စဥ်းစားပေးစေလိုပါသည် မည်သို့ပင် စဥ်းစားပါသော်လည်း အကြံအိုက်နေပါသည် သို့ကြောင့် အကြံဥာဏ်လေးများ ပေးကြပါကုန်။ ယခုနာမည်သည်လည်း သက်တမ်းကျန်ရှိနေသေးသောကြောင့် အကူးအပြောင်းကာလ အတွင်းမည်သို့မှ အခက်အခဲဖြစ်မည် မဟုတ်ပါ ယခင် co.cc မှပြောင်းသကဲ့သို့ပင် redirect လုပ်မည်ဖြစ်သည်။

(မှတ်ချက်။ ။ နာမည်ပြောင်းသဖြင့် လူလည်းပြောင်းသည်ဟု အထင်မကြီးစေချင်ပါ ဒုံရင်းဒုံရင်းအတိုင်းသာ ဖြစ်၏ )

လူမိုက်ဆိုလျင် ရှောင်သွေလွဲလို့မမှီဝဲနဲ့ကင်းအောင်နေ။ ပညာရှိကို အစဥ်တွဲလို ့မှီဝဲ ဆည်းကပ် နည်းယူပေ။ ကျက်တာတော့ ငယ်ငယ်ကတည်းက မကျက်ချင်လည်း ကျက်ရတယ်။ ကြီးလာမှ စဥ်းစားမိတာက အဲဒီနှစ်ခု အကြီးအကျယ်ပြဿနာ တက်နေတာပါလား။

အသေ ဝနာစ ဗာလာနံ ဆိုတော့ အမြင်ကိုက လူမိုက်ဖက်က မဟုတ်ပြန်ဘူး လူမိုက်မဟုတ်သေးတဲ့ လူဘက်ကနေ ပြောနေတာကိုးဗျ ဟုတ်တယ်လေ လူမိုက်နဲ့ပေါင်းရင် မမိုက်သေးတဲ့လူက မိုက်သွားနိုင်တယ်ပေါ့ အခုထက်ထိတော့ မှန်နေတယ်ထင်ပါတယ်။

ပဏ္ဍိတာ န ဉ္စ သေဝနာ ဆိုတော့လည်း ပညာရှိမဟုတ်သေးတဲ့ ကြားလူအဖြစ်ကနေ ပြောနေတာဖြစ်ပြန်ရော ပညာရှိနဲ့ပေါင်းတော့ ကိုယ်တပည့်ဖြစ်တာပေါ့ အဲလေ ကိုယ်လိမ္မာတယ်ဆိုတော့လည်း မှန်နေပြန်ရော။

အဲဒီနှစ်ခုကို ဆက်စပ်ကြည့်တော့ သချင်္ာလိုရေးရင် ဆုံးမခံတဲ့လူက ကြားလူနေရာမှာပဲ ပဏ္ဍိတလည်းမဟုတ် ဗာလလည်းမဟုတ် ကြားလူကိုဆုံးမနေတာပဲ။ ပြဿနာတက်တာက ပဏ္ဍိတနဲ့ ဗာလ ဖြစ်မယ်ထင်တယ်။ ဗာလကလည်း ပဏ္ဍိတဖြစ်ချင်ရှာသလို ပဏ္ဍိတကလည်း ဗာလဖြစ်မှာလည်း ကြောက်ရှာမှာပေါ့။ ဗာလက ပဏ္ဍိတကို ပဏ္ဍိတာ န ဉ္စ သေဝနာ ဆိုပြီးလာပေါင်းရင် ပဏ္ဍိတက အသေ ဝနာစ ဗာလာနံ ဆိုပြီး အပေါင်းအသင်း မလုပ်နိုင်ဘူးဆိုရင် ပြဿနာ။

လူမိုက်နဲ့ပေါင်းလို့ လူတိုင်းလူမိုက်ဖြစ်တာ မဟုတ်သလို လူလိမ္မာနဲ့ ပေါင်းလည်း လူလိမ္မာဖြစ်ချင်မှ ဖြစ်မှာကိုး။ ဗာလလည်း မဖြစ်ချင်ဘူး ပဏ္ဍိတလည်းမဖြစ်ချင်ဘူး ဗာလမိုက်တာတွေကြည့်ပြီး ကိုယ်သူတို့လိုမဖြစ်အောင် နေတာက ပဏ္ဍိတကိုသွားပြီး ပေါင်းတာက ပိုအကျိုးရှိမလားလို့ တစ်ခါတစ်လေတော့ ထင်မိတယ်။ ပြောသာပြောရမယ် ပဏ္ဍိတကိုလည်း ကြောက်တော့ အကြောက်သား ပဏ္ဍိတဆိုးတာက ဗာလထက် အဆတစ်ရာပိုမယ်။ ဒါကြောင့် ပဏ္ဍိတကိုလည်း အပေါင်းအသင်းကို မလုပ်ချင်တာပါ။

ငယ်ငယ်ကတည်းက မိဘတွေက အပြောအဆို အနေအထိုင်ကို သူ့ယဥ်ကျေးမှု့အလိုက် သွန်သင်ခဲ့ကြတာပါပဲ အခုနောက်ပိုင်းတော့ Online ယဥ်ကျေးမှု့အဖြစ် သင်စရာနောက်တစ်ခု တိုးလာနေတာတွေ့ရတယ်။ ဗမာပြည်မှာကတော့ အင်တာနက်ဆိုတာ အသုံးများတာ နှစ်ပိုင်းပဲရှိသေးတော့ လူငယ်တွေအနေနဲ့ သိပ်ပြီးတော့ မသိကြဘူး မိဘတွေကလည်း Online နဲ့ အဆက်အစပ်နည်းတာရယ် ဒါမှမဟုတ် အဆက်အစပ်မရှိတာရယ် ကြောင့်ဒါတွေကို သိပ်သတိမထားမိဘူး။ တစ်ခြားနိုင်ငံတွေမှာကတော့ အခုနောက်ပိုင်း ကလေးတွေကို စနစ်တစ်ကျ ထိမ်းချုပ်ပြီး ဘယ်လိုသုံးသင့်တယ် မသုံးသင့်ဘူးစသည်ဖြင့် ငယ်စဥ်ကတည်းက သင်ကြားပေးလာတာပါ။ ဒါတွေ မသိခဲ့တဲ့အတွက် ဘာတွေဖြစ်လာကြသလဲ ခြေရာခံမိတယ်။

အမြင်သာဆုံးကိုကြည့်မယ်ဆိုရင် အီးမေးကိုကောင်းကောင်း မရေးတတ်ကြဘူး ဗမာလိုရေးတာ အင်္ဂလိပ်လိုရေးတာကို မဆိုလိုပါဘူး။ အနည်းဆုံးတော့ ကျင့်ဝတ်လေးတွေတော့ သိသင့်တယ်။ တွေ့သမျလာသမျအီးမေးတွေကို ကိုယ့်ထဲက လိပ်စာမှာရှိသမျ အကုန်လုံး Forward လုပ်တဲအကျင့်လည်း တစ်ဖြည်းဖြည်း ပြင်ဖို့လိုနေပြီ။ တစ်ခါတစ်ရံမှာ တစ်ဘက်လူအတွက် တော်တော်လေး အနှောက်အယှက်ဖြစ်ရပါတယ်။ နောက်ပြီးတော့ အီးမေးကနေ ရန်လည်း ဖြစ်တတ်သေးတယ်။ နည်းနည်းတော့ကြာပါပြီ နာမည်ကြီး တက္ကသိုလ်နှစ်ခုက ဗမာကျောင်းသားများ သူ့ကျောင်းကောင်းတယ် ငါ့ကျောင်းကောင်းတယ် ပြိုင်ရာကနေစပြီး အီးမေးနဲ့ ဟိုဘက်သည်ဘက် ဆဲကြပါရောလား။ ဘေးလူအနေနဲ့ ကြည့်ရင် နှစ်ဘက်လုံး ဘယ်ကျောင်းကထွက်ထွက် အဆင့်အတန်း လုံးဝမရှိတဲ့ အဖြစ်ကိုရောက်ရပါတယ်။

နောက်ပြီးတော့ Personal Information တွေကို ဘယ်သူမှန်းမသိတဲ့လူတွေကို လုံးဝမပေးသင့်ဘူးဆိုတာလည်း အရေးကြီးပါတယ် ဗမာပြည်မှာ GTalk လို IM တွေခေတ်မရောက်ခင်က IRC တွေသုံးနေတဲ့ အချိန်ကဆိုရင် ဘယ်သူတက်လာ တက်လာ ASL ဆိုပြီးမေးတယ် အစတော့ မဟုတ်တာတွေ လျောက်ဖြေတယ် နောက်တော့ ဖုန်းနံပါတ်က အစအကုန်သိကုန်ပါရော။ အနည်းဆုံးတော့ ကိုယ်ကြိုက်မှန်းမသိ မကြိုက်မှန်းမသိ ဖုန်းခေါ်တဲ့ ဒဏ်တော့ခံရမယ်။ နောက်တော့ ဒီထက်ဆိုးတဲ့ ကိစ္စတွေဖြစ်ကုန်ကြတယ်။ GTalk ပေါ်လာတော့လည်း ချက်နေကျလူက ချက်ဖို့အတွက်ပဲ သုံးလိုက်တာပါပဲ။

ဟိုတစ်လောကလည်း ဘလော့တွေမှာ လိုက်ပြီး ဆဲနေပြန်ပါရောလား သူများဆဲတာအားမရလို့ ဟိုဘက်သည်ဘက်တောင် လင့်တွေချန်ထားခဲ့ပြီး ရန်ဖြစ်အောင် ထားခဲ့ပြန်တယ်။ ဖိုရမ်မှာ ရန်ဖြစ်တာများ ထူးဆန်းတဲ့ကိစ္စကို မဟုတ်တော့တာပါ ဗမာဖိုရမ်မှန်ရင် ရန်မဖြစ်တာ တွေ့ကိုမတွေ့ဘူး နည်းတာနဲ့များတာပဲကွာတယ်။ တစ်ခြားနိုင်ငံက ဖိုရမ်တွေ ဝင်ကြည့်တယ် မဖြစ်ဘူးလို့ပြောလို့မရပေမယ့် ဖြစ်ခဲပါတယ်။ သူ့လည်းမမြင်ရ ကိုယ့်လည်းမမြင်ရ Nick ပဲမြင်ရတဲ့ Virtual Community တွေမှာပိုပြီး ယဥ်ကျေးမှု့ထိမ်းသင့်တာကို မမြင်ရတာအကြောင်းပြုပြီး အားနာမှု့လည်းမရှိကြတော့တာ ပြဿနာတစ်ခုပဲ။

အခုတော့ Social Networking တွေမှာအသုံးများနေကြပြန်ပြီ။ Facebook ပေါ်မှာ မိတ်ဟောင်းဆွေဟောင်းတွေ ပြန်တွေ့ကြဘာကြနဲ့ ကောင်းပါတယ်။ နည်းနည်း စိတ်ချမ်းသာတာက တစ်ခြားနေရာတွေလို ရန်ဖြစ်တာမတွေ့သေးဘူး ဖြစ်နိုင်တာက သူ့ကိုယ်မသိ ကိုယ့်သူမသိအခြေအနေ မဟုတ်ပဲနဲ့ အပြင်က သူငယ်ချင်းအချင်းချင်းရယ် ပါတ်သက်ရာ ပါတ်သက်ကြောင်းတွေ ဆက်စပ်နေတာ မြင်နေရလို့ အားနာလို့မပြောကြတာလို့ပဲ သုံးသပ်ပါတယ်။ Social Networking ဆိုက်တွေမှာတောင် Personal Information တွေကို ထိမ်းချုပ်ထားသင့်ပါတယ် မိတ်ဆွေမဟုတ်ရင် ဘယ်သူ့ကိုမှ Personal Information ပေးမကြည့်တာ အကောင်းဆုံးပါပဲ။

မြင်သမျပြောမိပြန်ရင်လည်း လူအမြင်ကပ်တာ အဖတ်တင်မယ် သို့သော်လည်း နည်းပညာအပြောင်းအလဲမှာ လူနေမှု့ဘဝတွေလည်း ပြောင်းလဲသွားသလို မျိုးဆက်သစ်တွေကို ပျိုးထောင်တဲ့နေရာမှာ Virtual World ယဥ်ကျေးမှု့အတွက်လည်း တိုးပြီးလေ့ကျင့်ပေးသင့်ပြီလို့ပဲ မြင်မိပါတယ်။