#include<stdio.h>
main()
{
	int i, j;
	printf("Enter Number:");
	scanf("%d", &i);
	j = i * i;
	printf("Square: %d", j);
	return 0;
}

အခုအချိန်အထိ ဒီပရိုဂရမ်လေးကို မှတ်မိနေသေးတယ် စပြီးသင်နေတာ တစ်ပါတ်လောက်ရှိပြီဆိုတော့ စာအုပ်ထဲမှာတော့ ပရိုဂရမ်ကိုအတော်လေး ရေးနေပြီဖြစ်သလို နမူနာလေးတွေလည်း ရေးပြီးသားရှိနေပါပြီ။ ဒယ်ဒီဖားသားကလည်း သူ့ကွန်ပျူတာလေးက ကျွန်တော်သုံးမရတော့လို့ ကျွန်တော့်အတွက် ကွန်ပျူတာတစ်လုံး ဝယ်ပေးပါတယ် ကျွန်တော့်ရဲ့ဘဝမှာ ပထမဆုံးကိုယ်ပိုင် ကွန်ပျူတာပေါ့ ပထမဆုံး ကွန်ပျူတာပရိုဂရမ်ကို စပြီးရေးပြီး Execute လုပ်လိုက်တယ် ရေးထားတာက ၆ ကြောင်းထဲ တက်လာတဲ့ Error က ၆ ခုမကပဲ ပွစိတက်နေတယ်။ stdio မှာ stdo လို့ရေးထားမိတယ် scanf က &i မှာ i လို့ရေးမိတယ် return 0; မှာ ; မပါလာခဲ့ဘူး။ printf မှာ တွက်ပြီးသား j ကိုမရေးမိပဲ i လို့ရေးမိလို့ အဖြေမှန်မထွက်လာလို့ Error မရှိတဲ့နောက်တောင် အတော်လေးခေါင်းခြောက်သွားရတယ်။ မေးစရာလူမရှိဘူး ဖတ်စရာစာအုပ်ဆိုလို့ ကျောင်းကပုံနှိပ်စာအုပ် လက်တစ်ဝါးအရွယ် စာအုပ်လေးပဲရှိတယ် Turbo C IDE ဆိုတာကလည်း ပထမဆုံးစပြီးသုံးဖူးတာပဲ။ မှတ်မှတ်ရရ တစ်ညလုံးအချိန်ကုန်သွားမှ Error ကုန်သွားပြီး အလုပ်လုပ်တဲ့ Program တစ်ခုရခဲ့ဖူးတယ်။ ကုန်ဆုံးသွားတဲ့ ဆယ်စုနှစ်တစ်ခုရဲ့ ပထမဆုံးခြေလှမ်းကို အခုအချိန်အထိ အမှတ်တရနဲ့ သိမ်းထားတယ် မှတ်မိနေပါတယ်။ အဲဒီ့တစ်ညတာ အောင်အောင်မြင်မြင် မကုန်ဆုံးခဲ့ရင် ကြိုးစားမှု့လက်လျော့ခဲ့ရင် အခုအချိန်က ကျွန်တော့်အခြေအနေကို ရောက်ချင်မှရောက်ခဲ့မယ်လို့ အခုအချိန်ထိစဥ်းစားမိတယ်။ ကျူရှင်တက် စာကျက်ပြီး စာမေးပွဲဖြေဆိုတဲ့ လမ်းကြုံလိုက်ရမယ့် လမ်းကနေသွေဖီပြီး ဒီခြေလှမ်းက ကိုယ်တိုင်လျောက်ရမယ့် လမ်းကိုဦးတည်ပေးခဲ့ပါတယ်။