လွန်ခဲ့တဲ့သုံးရက်လောက်က စပြီးတော့ ကျွန်တော့်ရဲ့ ဘလော့လေး အနိစ္စသဘောနဲ့ ကိစ္စချောသွားပါတယ်။ ဖြစ်ပုံက Free Hosting မှာတင်ပြီး ရေးနေတော့ Free Hosting ကတစ်လကို လူဘယ်နှစ်ယောက်မဝင်ရင် ဖျက်မယ်ဆိုတဲ့ ပေါ်လစီရှိပါတယ်။ ကျွန်တော့်ရဲ့ဘလော့က လူဝင်ပေမယ့် ကျွန်တော် Register လုပ်ထားတဲ့နာမည်က calmhill.info ဖြစ်နေပြီး ကျွန်တော်သုံးနေတာက Subdomain ခွဲထားတဲ့ blog.calmhill.info ကိုသုံးနေတော့ မူရင်းဒိုမိန်းမှာ လူမဝင်ဘူးလို့ Hosting ကတွက်ချက်တာ မှားသွားတာကြောင့် ဖျက်တဲ့အထဲပါသွားပါတယ်။ ကံဆိုးချင်တော့ Backup ကလည်း ဖေဖော်ဝါရီလကုန်ကာနီးကနေပဲ ရှိတာကြောင့် Post တွေပြန်ရအောင်အတွက် RSS ယူထားတဲ့ လူတွေထံကနေ လိုက်ပြီးတော့ ပြန်တောင်းပြီးဖြည့်ထားရပါတယ်။ အဲဒါကြောင့် ဖေဖော်ဝါရီလနောက်ပိုင်းကနေ အခုနောက်ဆုံးအထိ Post တွေမှာ ဘလော့မိတ်ဆွေတွေ ရေးသွားသွားတဲ့ Comment တွေပျောက်ဆုံးသွားပါတယ်။ အဲဒီ့အတွက်တော့ အတော်လေး စိတ်မကောင်းဖြစ်ရပါတယ် ကျွန်တော်ဘလော့ကို အပြောင်းအရွှေ့များပါတယ် ဒါပေမယ့် Comment တွေမပျောက်အောင် အမြဲသတိထားပါတယ် ဒါပေမယ့် ဒီတစ်ခါတော့ Backup မှန်မှန်မလုပ်မိတဲ့ ကိုယ့်ကိုကိုယ်ပဲ အပြစ်တင်မိပါတယ်။ အဲဒီအတွက် ကျွန်တော့်ဘလော့က မိတ်ဆွေများ စိတ်အနှောက်အယှက်ဖြစ်ရရင်တော့ အထူးပဲတောင်းပန်ပါတယ်။ ကျွန်တော့်ရဲ့ အမြဲဘိုင်ပြတ်နေတဲ့ ထုံးစံအတိုင်း စိတ်မချရပေမယ့် Hosting မဝယ်နိုင်သေးလို့ Free Hosting မှာပြန်တင်မယ်လုပ်တော့ ကိုဒီဘီအေကနေ သူ့ရဲ့ Hosting မှာလာတင်ပါ Free Hosting စိတ်မချရပါဘူးဆိုပြီး Account တစ်ခုလုပ်ပေးလို့ အခုကျွန်တော့်ရဲ့ ဘလော့လေး အသက်ဆက်သွားတာပါ။ အဲဒီ့အတွက်လည်း ကိုဒီဘီအေကို အထူးကျေးဇူးတင်ရပါကြောင်း ဒီနေရာကနေ ပြောကြားလိုက်ရပါတယ်ခင်ဗျာ။

အပြောင်းအရွှေ့လည်း လုပ်လို့ပြီးသွားပါပြီ တစ်ချို့နေရာတွေမှာ Converter အမှားတွေကြောင့် စာလုံးပေါင်းနည်းနည်း မှားနေတာတွေ ဖြစ်သွားပါတယ် ဒါတောင်တော်တော်များများကို ကိုယ့်ဟာကိုယ်ထည့်သင့်တာထည့် ထုတ်သင့်တာထုတ်နဲ့ ပြင်ထားလို့တော်တော်လေး အမှားနည်းသွားပါတယ်။ Standard Unicode Font မရှိလည်း ဖတ်လို့ရဖို့အတွက် On-the-fly converter လည်းထည့်သုံးလိုက်ပါတယ်။ IE မှာတော့ EOT နဲ့အဆင်ပြေပါလိမ့်မယ်။ Comment များကိုတော့ လာနေကျ သူငယ်ချင်းများ ရေးချင်တာနဲ့သာ ရေးခဲ့ကြပါ ကိစ္စမရှိပါဘူး ပြီးမှသာ ကျွန်တော်ပြန်ပြင်ပေးပါ့မယ်။ ကြားထဲမှာ စာလုံးတွေပြန်ပြင်ဖို့ Moderation ခံထားလိုက်လို့ အရင်လိုတော့ Comment ရေးလိုက်ချင်း ပေါ်အောင် လုပ်ထားလို့ မရတော့ဘူး ဖြစ်သွားပါတယ် အဲဒါလေးတော့ နည်းနည်းနားလည်ပေးကြပါလို့ တောင်းပန်ပါတယ်။

Standard Unicode Font များကိုသုံးမယ်ဆိုပါကလည်း Padauk, Myanmar3, Yunghkio Unicode စတာတွေကိုသုံးနိုင်ပါတယ်။ Padauk, Myanmar3 ကတော့ ဗမာစာအတွက် အသုံးပြုနိုင်မှာဖြစ်ပြီးတော့ Yunghkio Unicode ကတော့ ရှမ်းစာအတွက်ပါ အသုံးပြုနိုင်ပါလိမ့်မယ် ရှမ်းစာအတွက်တော့ လက်ရှိအနေအထားမှာ Yunghkio Unicode တစ်ခုပဲ Standard Unicode Font အဖြစ်ရှိနေပါသေးတယ်။ စကားလုံးတွေကို ဇော်ဂျီလိုမြင်ချင်တယ် ဒါပေမယ့် Standard Unicode လည်းသုံးချင်တယ်ဆိုရင်တော့ Padauk-Zawgyi နဲ့ Yunghkio 005 ကိုသုံးနိုင်ပါတယ်။ ရနိုင်မယ့် Link များကိုလည်း အောက်မှာဖော်ပြပေးထားပါတယ်။ အဆင်မပြေတာတွေ ဖတ်လို့မရတာတွေ ရှိလာရင်တော့ Browser အမျိုးအစားနဲ့ သုံးထားတဲ့ Font တွေအကြောင်းနည်းနည်း ပြောပြထားပေးခဲ့ကြပါ။

http://scripts.sil.org/cms/scripts/page.php?site_id=nrsi&id=Padauk

http://www.myanmarnlp.net.mm/downloads/Myanmar3_Unicode.zip

http://www.yunghkio.com/Yunghkio_Unicode.ttf

http://padauk-zawgyi.googlecode.com/files/Padauk-Zawgyi.ttf

http://sites.google.com/site/calmhillfile/files/yunghkio_005_20090923_ship.ttf

မနေ့ကတော့ Blogger ရဲ့ Comment ကိုမသုံးတော့ပဲ Disqus ကိုစမ်းသုံးလိုက်တယ် အဆိုဆုံးအခြေအနေဖြစ်သွားပြီး ရေးလို့မရဘူးဖြစ်သွားပါတယ်။ ဒါနဲ့ပဲ Blogger ကိုနှုတ်ဆက်ပြီး WordPress လေးပဲပြန်တင်သုံးလိုက်ပါတယ်။ ပြီးမှပဲပြင်စရာရှိတာ ပြန်ပြင်လိုက်ဦးမယ် ပြင်ချင်ရာပြင်လို့ရတဲ့ကိစ္စလည်း ဒီနေရာတော့အတော်လေး အကောင်းသားပဲ။

ဒီရက်ပိုင်းမှ ဘလော့ကို ဟိုပြောင်းဒီပြောင်း လုပ်တာစမ်းရင် သတိထားလိုက်မိတာက ဘလော့ဆိုက်က အတော်ကြီးသွားပြီ စာတွေရေးတာ ရှည်တာလည်းပါမယ်ထင်တယ် Export လုပ်လိုက်တာ 3 MB လောက်ရှိလာတယ်။ ဒါတောင် တစ်နှစ်လောက်ပဲ ရှိပါသေးတယ် နောက်ဆိုဒီထက်ပဲ များလာဖို့ရှိတယ်။ မနေ့ကလည်း Facebook မှာငြင်းခုန်နေကြတာ မြင်နေလို့သတိရတာလည်း ပါလာပါတယ်။ လက်ရှိ Zawgyi ကနေ Standard Encoding ကိုပြောင်းမယ်ဆိုရင် Converter တွေရှိတယ်ဆိုပေမယ့် Zawgyi ကစာရိုက်တဲ့ Sequence ကိုရိုက်ချင်သလို ရိုက်လို့ရအောင် ခွင့်ပြုထားတဲ့အတွက် အထိုက်အလျောက်တော့ ဆုံးရှုံးမှု့ရှိပါတယ် ဒါတောင်ကျွန်တော် စာရိုက်တဲ့ Sequence က အတတ်နိုင်ဆုံးမှန်နေတဲ့အတွက် နည်းနည်းလောက်ပဲဆုံးရှုံးပေမယ့် မူရင်းလိုတော့ပြန်မရနိုင်တော့ပါဘူး။ မူရင်းဆိုတဲ့နေရာမှာ Contents ကိုဆိုလိုပါတယ်။ လက်နဲ့လိုက်ပြင်မလားဆိုတော့ နည်းတုန်းကတော့ ဖြစ်နိုင်ပါတယ် အခုတော့ကျွန်တော်လည်း ဒီလောက်စာအများကြီးမှာ မပြင်နိုင်တော့ပါဘူး။ ရှေ့ဆက်ပြီး ဘယ်လို Encoding နဲ့ကျွန်တော့်ရဲ့ Data တွေကို ထိမ်းသိမ်းမယ်ဆိုတာကို ကျွန်တော်စဥ်းစားရပါတယ် ဒီတော့ရည်ရှည်အတွက် Standard Encoding နဲ့ပဲသိမ်းဖို့ ကျွန်တော်ဆုံးဖြတ်ပါတယ်။

ဘလော့ဖြစ်နေတော့ ကျွန်တော်ရေးလို့ ကျွန်တော်ပိုင်ပေမယ့် ဘလော့လာဖတ်သူ အများနဲ့လည်း သက်ဆိုင်နေပါတယ် ကျွန်တော် Standard Encoding သုံးလို့လာတဲ့လူကို အဲဒါသုံးပြီးဖတ်လို့ တွန်းအားပေးလိုစိတ် လုံးဝမရှိပါ။ On-the-fly Converter အစကတည်းက ရေးပြီးသားရှိနေတာပါပဲ အဲဒါကိုကျွန်တော်ယူသုံးလို့ရတာပါပဲ။ အစကတော့ Format နှစ်မျိုးထားပြီးတော့ နှစ်ခုလုပ်ထားဖို့ ရည်ရွယ်ပါသေးတယ် နှစ်ခုရှိလည်းကျွန်တော် နှစ်ခုမတင်ဖြစ်တာများပါတယ်။ On-the-fly Converter ယူသုံးလိုက်တာက ကိစ္စအရှင်းဆုံးဖြစ်မယ်ထင်ပါတယ် ကွန်ပျူတာမှာအမြဲသုံးတဲ့ စကားတစ်ခုက What You See Is What You Get ဒီတော့ကျွန်တော် ဘယ်လိုသိမ်းသိမ်း လာဖတ်တဲ့လူ မြန်မာလိုဖတ်လို့ရရင် ပြီးတာပါပဲ။ Zawgyi နဲ့လား Standard နဲ့ညီတဲ့ Font နဲ့လားက အရေးမကြီးပါဘူး အရေးကြီးတာက ဖတ်တဲ့လူက မြန်မာလိုဖတ်လို့ ရဖို့ပဲအရေးကြီးတာပါ။ တစ်ခုပဲရှိမယ် Comment ရေးကြတဲ့ကိစ္စတွေတော့ လာလည်တဲ့လူက ရေးတာဆိုတော့ သူတို့မှာရှိတဲ့ Input နဲ့ပဲရေးကြမှာပါပဲ ဒါတော့ကျွန်တော် ကိုယ်တိုင်ပြန်ပြင်ရတော့မှာပေါ့ ကျွန်တော့်ဘလော့က မဟုတ်လည်း Comment နည်းတာပဲဟာ တပင်တစ်ပန်းလုပ်ရမယ့် အလုပ်မှမဟုတ်တာပဲ။ ကိစ္စမရှိဘူး ဘာနဲ့သုံးသုံးရေးထားခဲ့ပါ နောက်မှကျွန်တော် Encoding ပြန်ပြောင်းဖို့လိုရင် ပြန်ပြောင်းမှာပေါ့။ Blogger ကတော့ Comment ကိုပြင်ခွင့်မပေးဘူး ဒီတော့ပြင်ချင်ရင် ကျွန်တော် WordPress ပြန်ပြောင်းသုံးမှာပေါ့ ဒါဆိုရင် မြန်မာပြည်က လူတွေလည်း မကျော်မခွရပဲ Comment ရေးလို့ရသွားတာပေါ့။

ဘာလို့ပြောင်းသလဲမေးရင် ပြောင်းချင်လို့ပြောင်းတာပါ ဘလော့စရေးကတည်းက သုံးဖို့ရည်ရွယ်ခဲ့ပါတယ် ဒါပေမယ့်အကြောင်း အမျိုးမျိုးကြောင့် မလုပ်ဖြစ်ခဲ့သေးတာပါ။ နောက်ပြီးတော့ အမှားတွေများရင် Data တွေပိုများလာရင် အပြောင်းအလဲဆုံးရှုံးမှု့က ပိုများမှာကိုစိုးရိမ်ပါတယ် နှစ်ဘက်ထိမ်းသိမ်းရတာလည်း မလုပ်ချင်တော့တာနဲ့ ပြောင်းဖို့ပြင်ဆင်တာပါ။ ဘယ်တော့လောက် အပြီးသတ်ပြောင်းမယ်တော့ မပြောတတ်သေးပါဘူး ရှေ့လထဲမှာတော့ ပြောင်းဖြစ်မယ်ထင်ပါတယ် အလုပ်အခြေအနေအပေါ်လည်း မူတည်ပါတယ်။ နမူနာအစမ်းပြောင်းထားတာကတော့ http://unicalmhill.blogspot.com/ လာနေကျဘော်တာများလည်း စမ်းပြီးဝင်ဖတ်ပေးပြီး ဖတ်လို့ရမရတစ်ချက် ပြန်ပြောပေးပါလား။ December အစလောက်ကတည်းက ပြောင်းဖို့လုပ်နေတာ မအားတာနဲ့ အခုမှသာဆက်လုပ်နိုင်တာပါ။ ဖတ်လို့မရဘူးဖြစ်နေရင်တော့ Browser အမျိုးအစားတွေ တစ်ချက်ပြန်ပြောပေးခဲ့ပါဦး။ ကျွန်တော်လည်း နောက်တစ်မျိုးစမ်းရတာပေါ့ ရေးပြီးသားရှာသုံးလို့မရရင်တော့ ကျွန်တော်အပျင်းကြီးလို့ မရတော့ဘူးလေ ကိုယ်တိုင်ပဲစမ်းလုပ်ရတော့မှာပေါ့။ အစမ်းလုပ်ကြည့်လို့မှ လူတော်တော်များများ ဖတ်မရဘူးဆိုရင်တော့လည်း အဆင်ပြေအောင် တစ်ခုတော့စဥ်းစားရုံပေါ့။

ခေါင်းခြောက်ဆံဖြူ အလုပ်များဖြင့် အလုပ်များမဟားဒယားများ အလွန့်အလွန်ဖိအားများကာ စူပါဘီဇီးဖြစ်နေပါသဖြင့် အစောဆုံးအနေဖြင့် လာမည့်တစ်ပါတ် အင်္ဂါမှသာဘလော့သို့ ပြန်လာပါတော့မည်။ ဗရုတ်သုတ်ခ စာများကိုသည်းခံကာဖတ်ရင်း လာရောက်လည်ပတ်ကြသော ဘလော့မိတ်သဟာများ အသစ်မတင်နိုင်ခြင်းအတွက် ကြိုတင်တောင်းပန်သွားပါသည်။

RSS Link ကို Hosting ပြောင်းရလွယ်စေရန် http://feeds.feedburner.com/CalmHill ဟုပြောင်းလဲပါမည်။ Comment ရေးရခြင်းများကို ကျော်ရခွရမဖြစ်စေရန် အခြား Blog Software ပြောင်းချင်ပြောင်းမည်ဖြစ်ပါသဖြင့် RSS ခဏခဏ ပြောင်းရခြင်းများမဖြစ်ရန် Feed Burner ဖြင့် ပြောင်းထားလိုက်ပါသည်။ ခဏခဏပြောင်းနေသဖြင့် စိတ်အနှောက်အယှက်ဖြစ်ရသော ဘော်တာများကို အထူးတောင်းပန်ပါသည်။

စာမေးပွဲလည်း လွန်စွာနီးကပ်နေပြီဖြစ်ပါသည် စာလည်းသင်ရိုးကုန်အောင် အချိန်ဇယားဆွဲကာ ဖတ်နေရပါသည်။ ထို့ကြောင့် ဘလော့ပေါ်သို့ မှန်မှန်လာနိုင်တော့မည်မဟုတ်ပါ။ ထို့ကြောင့် ဘလော့ပေါ်မှ လကုန်အထိ ရှောင်တခင်ခွင့်ဖြင့် လစ်သွားပါသည်။ စာဖတ်၍ဥဏှောက်ခြောက်လာပါက ခဏခန့်တော့ ဘလော့ပေါ်တက်လာမည်ဖြစ်ပါသည်။ ထို့ကြောင့် မှာစရာရှိသည်များ မှာကြားထားခဲ့ကြပါ တုန့်ပြန်ချိန်အနည်းငယ်ကြာပါမည်။

ဘလော့အလည်ထွက်တာ များလာလို့ထင်တယ် တဂ်သံသရာပြန်လည်လာပြန်ပြီ။ ထို့ကြောင့် တဂ်လုပ်ထားသော ပို့များများလာပါသည် ချက်ချင်းလည်း မရေးနိုင်သေးဖြစ်နေပါသည် သို့ကြောင့် အကွေးစာရင်း ပြုလုပ်ထားရှိပါသည် အချိန်ရသည်နှင့် အကွေးများကို ရှင်းပေးပါမည်။ စာရင်းပုံစံမှာ FIFO ဖြစ်ပါသည်။

ဘလော့အသစ်ကို လာရောက်လည်ပါတ်ကြသော ဘလော့မိတ်ဆွေများကို ကြိုဆိုပါသည်ခင်ဗျာ။ မှန်မှန်ရေးနိုင်အောင်လည်း ကြိုးစားပါဦးမည်။ အဘယ့်ကြောင့် နာမည်ပြောင်းပါသနည်းဟု မေးခဲ့သည်ရှိသော် မမဆင်ပြောသကဲ့သို့ ဘုံဆိုင်နာမည် ဖြစ်နေသောကြောင့် ဖြစ်ပါသည်။ အိမ်ထောင်ကျသွားသဖြင့် နာမည်ပြောင်းသလားဟု အထင်တကြီးမေးမည့်သူများကိုလည်း ကြိုတင်ကာငြင်းလိုပါသည် မဟုတ်မမှန်သော ကောလဟာလသတင်းများဖြစ်သည်။

ယခုဘလော့ကို နာမည်ပြောင်းမည်ဟု အကြံဖြစ်နေသည်မှာ ကြာပြီဖြစ်ပါသည်။ သို့သော်လည်း အလုပ်ရှုပ်မည်က တစ်ကြောင်း မအားမလပ်ဖြစ်နေသည်က တစ်ကြောင်းကြောင့် မပြောင်းဖြစ်ပဲဖြစ်နေခဲ့ပါသည်။ မောင်စေတန်ကလည်း ဟိုတစ်လောကပြောသည် ဦးဂူဂဲကို လူပျိုကြီးဟု မေးလိုက်ရာ ထွက်လာသော အဖြေများမှာ ကြက်ခြေခတ် သုံးလုံးများလည်း ပါလာသဖြင့် မကောင်းဟုဆို၏။ မှန်ပါသည် ထိုသို့ဖြစ်နေသည်မှာ ကြာပြီဖြစ်ပါသည် သို့ကြောင့် နာမည်မပြောင်းပါက အနှီလူများနှင့် ကြာလျင်လူမှားတော့မည်ဖြစ်သည်။ ဤအချက်မှာ အရေးအကြီးဆုံးဖြစ်၏။

နောက်ထပ်အကြောင်းတစ်ခုမှာ ကိုဒီဘီဖြစ်သည်။ ထိုလူကြီးမှာ လူတစ်ယောက်တွေ့တိုင်း မိတ်ဆက်ပေးလျင် ဒါလူပျိုကြီးဟုသာ မိတ်ဆက်တော့သည် သို့ကြောင့် ကြာလျင် ရာသက်ပန် နာမည်တွင်တော့မည် ဖြစ်သည်။ နာမည်ကို မည်သို့ပင်ခေါ်ခေါ် ကိစ္စမရှိပါ စိတ်ထဲလည်း မည်သို့မှပင် မဖြစ်ပါ။ သို့သော် စကားများသော ကျွန်တော်နှင့် ထိုနာမည်ကား ပြဿနာတက်ပါသည် အမျိုးသမီးများနှင့်စကားပြောပါက ထိုအမျိုးသမီးများမှ နာမည်ကိုကြည့်ကာ ကြောက်ရွံ့ကြပါသည်။ ဤမျလောက် ပေါတောတောနေတတ်သော ကျွန်တော့်ကို နာမည်ကြောင့် ရွံ့နေခြင်းမဖြစ်စေသင့်ဟု ယူဆမိသည်။

သို့ကြောင့် နာမည်ပြောင်းပါတော့မည် လာရောက်ဖတ်ရှု့ကြသော စာဖတ်သူများနှင့် မလာပဲ RSS ဖြင့်ဖတ်ကြသောသူများလည်း ဖြစ်နိုင်မည်ဆိုပါက နာမည်ကို စဥ်းစားပေးစေလိုပါသည် မည်သို့ပင် စဥ်းစားပါသော်လည်း အကြံအိုက်နေပါသည် သို့ကြောင့် အကြံဥာဏ်လေးများ ပေးကြပါကုန်။ ယခုနာမည်သည်လည်း သက်တမ်းကျန်ရှိနေသေးသောကြောင့် အကူးအပြောင်းကာလ အတွင်းမည်သို့မှ အခက်အခဲဖြစ်မည် မဟုတ်ပါ ယခင် co.cc မှပြောင်းသကဲ့သို့ပင် redirect လုပ်မည်ဖြစ်သည်။

(မှတ်ချက်။ ။ နာမည်ပြောင်းသဖြင့် လူလည်းပြောင်းသည်ဟု အထင်မကြီးစေချင်ပါ ဒုံရင်းဒုံရင်းအတိုင်းသာ ဖြစ်၏ )

ကဲကဲ Comments တွေမှာက နှစ်ယောက်ရေး နှစ်ယောက် ကန့်ကွက်ဖြစ်နေတယ်။ ပုံမှန်ဖောက်သည် နှစ်ယောက်ဖြစ်နေတော့ တော်တော်လေး စဥ်းစားစရာဖြစ်လာပါတယ်။ ဒါကြောင့် Technical Blog ကိုပြုလုပ်နေခြင်းကို ရပ်ဆိုင်းထားလိုက်ပါတယ်။ အခုတစ်မျိုး တော်တော်ကြာ တစ်မျိုးပဲ ပြောပြော မတတ်နိုင်တော့ဘူး။ လာနေကျလူတွေပြောလာတော့ လုပ်နေတာကို ပယ်ဖျက်ထားလိုက်ပါတယ်။

P.S

လုပ်ရင်းနဲ့ပျင်းနေတာလည်းပါ မအားတာလဲပါပါသည်။