ငယ်တုံးကတော့ တောင်ကြီးမှာနေတယ် ဒါပေမယ့်အမေက အညာသူဆိုတော့ ဟင်းချက်ရင် အညာကပုံစံပဲ ချက်လေ့ရှိပါတယ်။ ကြက်သွန်ဆီသတ်ြပီး ခရမ်းချဉ်အနှစ်နဲ့ အများအားဖြင့်ချက်ပါတယ် အောက်ြပည်အောက်ရွာလို ကြက်သွန်နဲ့အနှစ်လုပ်တာ မဟုတ်ပါဘူး။ မန္တလေးပြန်လို့ အဖွားတို့က အညာအစားအတွေ ထည့်ပေးတတ်တယ် အဖွားလေးရဲ့ယောက်ျားက စစ်ကိုင်းဘက်က လက်ပံစင်မှာ အမျိုးတွေရှိတယ် သူတို့ကနေပြီး နွားနို့ခဲတွေ နွားနို့ချက်တွေ ယူလာပြီးလက်ဆောင် ပေးတတ်ပါတယ်။ အညာကအစားအသောက်ထဲမှာ ကျွန်တော်အကြိုက်ဆုံးက နွားနို့ခဲချက်ပါ။ ကျွန်တော်ကြိုက်မှန်းသိတော့ ကျွန်တော့်အတွက်ပဲ ချက်ပေးတာများပါတယ်။ တစ်ခါတစ်ယံ တောင်ကြီးဈေးထဲမှာ သာစည်ကလာရောင်းတဲ့ နွားနို့ခဲသည်တွေ့ရင် အမေကအမြဲဝယ်လာပေးပါတယ်။

အဖေနဲ့မုံရွာလိုက်သွားရင် ဒေါ်ကြီးကိုပူဆာပြီးတော့ နွားနို့ခဲလုပ်ပြီးချက်ခိုင်းတယ်။ ဒေါ်ကြီးကတော့ နွားနို့ခဲလုပ်တာ လုပ်နေကျဆိုတော့ ကျွမ်းကျင်ပါတယ်။ နွားနို့ကိုအိုးလေးထဲထည့်ပြီး ဆူအောင်တည်ပါတယ် နွားနို့ပူလာပြီဆိုရင် ခြံထဲမှာပေါက်နေတဲ့ မရိုးပင်ကကိုင်းလေး တစ်ကိုင်းနှစ်ကိုင်း သွားချိုးပြီးထွက်လာတဲ့ မရိုးစေးလေးတွေကို နွားနို့အိုးထဲ့ထည့်ပြီး မရိုးကိုင်​းလေးနဲ့ပဲ မွှေရင်းနဲ့ပဲနွားနို့ကခဲလာပါတယ်။ အဲဒါလေးကို အဝတ်ပါးထဲလောင်းထည့်ပြီး အရည်စစ်ထားပြီး ငရုတ်ဆုံနဲ့ဖိထားလိုက်တယ်။ အရည်စစ်သွားရင် ခဲနေတဲ့နွားနို့ခဲလေးကို ထန်းလက်လေးနဲ့ဖြစ်ဖြစ် ဆတ်သွားဖူးရွက်နဲ့ဖြစ်ဖြစ် ပတ်ပြီးတော့မီးကင်ပါတယ် ဒါမှနွားနို့ခဲလေး အပေါ်ယံလေးတင်းပြီး အညိုရောင်လေး ဖြစ်သွားတယ်။ နွားနို့ခဲလေးကို ခရမ်းချဉ်သီး အနှစ်လေးနဲ့ချက်ရင် ချဉ်ချဉ်ဆိမ့်ဆိမ့် နွားနို့နံ့သင်းသင်းလေးနဲ့ အင်မတန်ကြိုက်ပါတယ်။

အခုတော့ နွားနို့ခဲကိုမစားရတာ နှစ်အတော်ကိုကြာပါပြီ စမ်းလုပ်ကြည့်ချင်ပေမယ့် မရိုးပင်မတွေ့တော့ လုပ်မရဘူးဖြစ်နေတယ်။ တစ်ခါကတော့ ရုက္ခဗေဒဥယျာဉ်ထဲမှာ မရိုးပင်ကိုတွေ့မိတယ် ဒါပေမယ်ဝေးလွန်းတော့ သွားပြီးခိုးချင်ပေမယ့် မလွယ်ဘူးဖြစ်နေတယ်။ အိမ်ရှင်ထီးလက်ရာမှာ အစ်ကိုတစ်ယောက် လုပ်ထားတာမြင်လို့ မရိုးမရှိပဲဘယ်လိုခဲသလဲ မေးလိုက်မိတော့ သံပုရာရည် နည်းနည်းထည့်ရင်အတူတူပဲလို့ပြောတယ် ဒါနဲ့သံပုရာကို မရိုးအစားထည့်သုံးလိုက်တယ်။ ကျန်တာကတော့ ငယ်ကတည်းက ဒေါ်ကြီးလုပ်တာမြင်နေကျဆိုတော့ မခက်ခဲပါဘူးလေ။ အညာလိုတော့ ခြံကနွားနို့တော့မဝယ်နိုင်ဘူးပေါ့ Dutch Lady နှစ်ဘူးဝယ်ပြီး နွားနို့ခဲလိုက်ပါတယ်။ ချက်ချင်းလုပ်ပြီးချက်တော့ မီးကင်တော့ပါဘူး ဒီအတိုင်းလေးပဲချက်လိုက်တယ်။ မစားရတာကြာတော့ အတော်လေးစားကောင်းတယ် ဒါပေမယ့် ဒေါ်ကြီးလုပ်တဲ့ နွားနို့ခဲကိုတော့ ဘယ်လိုမှမမှီဘူး။

အရင်တစ်ပါတ်က အစ်မတစ်ယောက် အဆောင်ကိုအလည်သွားတာ ငရုတ်ပွကို အဆာသွပ်ပြီး ချက်တာစားခဲ့ရတယ်။ မနေ့ညကတော့ စျေးသွားရင်းနဲ့ ငရုတ်ပွအကြီးကြီးတွေ့လို့ အဆာသွပ်ဦးမယ်ဆိုပြီး အသားကြိတ်သားနဲ့ အဆာပလာတွေ ဝယ်လာလိုက်တယ်။ အလုပ်ရှုပ်တယ် ထင်ရပေမယ့် အလုပ်မရှုပ်ပါဘူး ချက်ရတာသက်သာပါတယ်။

လုပ်ပုံလုပ်နည်းကတော့ အင်မတန်လွယ်ပါတယ် ဂျူးမြိတ်နဲ့ မှိုကို သေးသေးလေးတွေ ဖြစ်အောင် နုတ်နုတ်လှီး အသားကြိတ်သားနဲ့ နယ်သာထားလိုက်ပါ ဆားနည်းနည်း ပဲငံပြာရည်နည်းနည်း ချင်းရည်နည်းနည်း ထည့်နယ်ပါ အဲဒါဆိုအထဲကိုထည့်မယ် အဆာတွေကိစ္စပြီးပါပြီ ကျွန်တော်ကတော့ ကြက်သွန်ဖြူကို ကြိုက်လို့ အတောင့်လိုက် အသားထဲထည့်ထားပါတယ်။ ပန်းငရုတ်ပွကို အပေါ်ပိုင်းကို ဓားသေးသေးနဲ့ ဖွင်လိုက်ပြီးအထဲက ငရုတ်အစေ့တွေကို သန့်ရှင်းလိုက်ပါ စောစောက အဆာတွေထည့် အပေါ်ကနေဖွင့်ထားတဲ့ အပိုင်းလေးပြန်ပိတ် ရေနွေးငွေ့နဲ့ နာရီဝက်လောက် ပေါင်းလိုက်ပါ အဲဒါဆိုရင် စားလို့ရပါပြီ ငရုတ်ပွနဲ့ မွှေးမွှေးလေးနဲ့ အသားပေါင်း ချိုချိုလေးရပါပြီ။

မမဆင်ဆင်က Mayonnaise လုပ်တတ်သလားဆိုလို့ လုပ်တဲ့နည်းရေးထားပါတယ် Mayonnaise လုပ်တာက မခက်ပါဘူး အိမ်မှာကိုယ်တိုင် လုပ်လို့ရပါတယ် အင်မတန်လွယ်ပါတယ် လိုအပ်အတဲ့ပစ္စည်းတွေကလည်း ကြက်ဥအနှစ်၊ သံပုရာသီး၊ ရှာလကာရည်၊ Dijon or Yellow Mustard ၊ ဟင်းရွက်ဆီ၊ ဆား၊ ငရုတ်ကောင်း ဒါတွေရှိရင်ရပါပြီ။ Mustard ကတော့ ဗမာပြည်မှာလည်း ဝယ်လို့ရမယ်ထင်ပါတယ် Super Market တွေမှာရှိမှာပါ ရှာမရလည်းမထည့်နဲ့ ကိစ္စမရှိဘူး မပါလည်းရပါတယ်။ ဗမာပြည်မှာနေတုံးက ဝယ်ရတာရှားလို့ မထည့်ပဲလုပ်ပါတယ် ကိစ္စမရှိပါဘူး။

Mayonnaise စလုပ်မယ်ဆိုရင် သန့်ရှင်းရေးက အရေးကြီးပါတယ်။ Mayonnaise လုပ်ဖို့ ဖန်ပန်းကန်လုံး ခပ်ကြီးကြီးလိုပါတယ် ဖန်မရလည်းကွေပန်းကန်ပေါ့ သတ္တုပန်းပန်တော့ မသုံးတာကောင်းပါတယ်။ သန့်ရှင်းအောင်ဆေးပြီး ရေတစ်စက်မှ မကျန်အောင် ခြောက်သွေ့နေဖို့လိုပါတယ် ရေပါရင် Mayonnaise ပျက်သွားပါတယ်။ Mayonnaise လုပ်ချိန်မှာ အပူလည်းမထွက်ဖို့လိုပါတယ် အေးတဲ့တိုင်းပြည်တွေမှာတော့ Room Temperature လို့ပြောကြတယ် ပူတဲ့နိုင်ငံအဖို့ကတော့ ဖြစ်နိုင်ရင် Mayonnaise လုပ်မယ့်ပန်းကန်အောက်မှာ ရေခဲခံပြီး Mayonnaise လုပ်တာအဆင်ပြေတယ် အရမ်းတော့အရေးမကြီးလှပါဘူး။

အရင်ဆုံးကြက်ဥကို အကာနဲ့အနှစ်ခွဲဖို့လိုပါမယ် Mayonnaise မှာက ကြက်ဥအနှစ်ကိုပဲသုံးပါတယ်။ ကြက်ဥအကာနဲ့အနှစ်ခွဲတဲ့ ပန်းကန်လေးတွေလည်းရှိပါတယ် အလွယ်ဆုံးနဲ့ အကောင်းဆုံးကတော့ ကြက်ဥကိုဖောက်ပြီး လက်ထဲကိုထည့်ပါ ကြက်ဥအကာတွေဟာ လက်ချောင်းလေးတွေ ကြားကနေထွက်ကျသွားပါမယ် နောက်ပြီးတော့ ကြက်ဥမှာပါတဲ့ အချင်းကိုလည်း ကြက်ဥအနှစ်မပေါက်အောင် အသာလေးဖယ်လိုက်ပါ။ သတိထားရမှာက ကြက်ဥအကာလုံးဝမပါဖို့ရယ် လက်ကိုရေခြောက်နေစေဖို့ သတိထားပါ။ ကြက်ဥအနှစ်သန့်ရှင်းလေလေ Mayonnaise ကောင်းလေလေပါပဲ။

Mayonnaise စလုပ်မယ်ဆိုရင် ကြက်ဥအနှစ်နှစ်လုံးကို ဖန်ပန်းကန်ထဲကိုထည့်ပါ။ သံပုရာသီးတစ်ခြမ်းကို အဖတ်တွေမပါဖို့ ဇကာခံပြီးတော့ ညှစ်ထည့်ပါ။ ရှာလကာရည်အဖြူ တစ်ဇွန်းထည့်ပါ။ Mustard တစ်ဇွန်းလောက်ထည့်ပါ။ ပြီးရင်တော့ ကြက်ဥမှေတံနဲ့ သမအောင်မှေပါ ကြက်ဥမှေတံမရှိရင်တော့ ခက်ရင်းနဲ့ခေါက်လို့ရပါတယ် သမသွားပြီးဆိုရင် ဆီကိုစပြီးထည့်ပါမယ် အရေးကြီးတာက ဆီစပြီးထည့်တာနဲ့ Mayonnaise မဖြစ်မချင်းရပ်လို့မရဘူးဆိုတာ သတိထားပါ။

ဆီကို နည်းနည်းချင်း ထည့်ပေးပါ နည်းနည်းချင်းဆိုရာမှာ ဇွန်းတစ်ဝက်လောက်ချင်း ထည့်ပေးနိုင်ရင် ပိုကောင်းပါတယ်။ ဆီနည်းနည်းထည့်လိုက် သမအောင်မှေလိုက်နဲ့ ဆက်တိုက်ပဲ မှေနေရပါမယ် မရပ်ရပါဘူး။ လူနှစ်ယောက်ဆိုရင် ပိုအဆင်ပြေပါတယ် တစ်ယောက်က ဆီထည့်ပေးပြီး တစ်ယောက်က အဆက်မပြတ် မှေနေရပါတယ်။ ဆီထည့်တာ မလောဖို့လည်းလိုပါတယ် ထည့်တာများသွားလို့ သမအောင်အချိန်မှီမမှေနိုင်ရင် အရည်ကျဲပြီး Mayonnaise ပျက်သွားပါတယ်။ Mayonnaise အပြစ်အကျဲ အတော်လောက်ဖြစ်သွားရင် ဆားတစ်ဇွန်းလောက်ရယ် ငရုတ်ကောင်း ဇွန်းဝက်လောက်ထည့်မှေပြီး ရပ်လိုက်လို့ရပါပြီ။ ကြက်ဥနှစ်လုံးအတွက်ဆို ဆီက လက်ဘက်ရည် ပန်းကန်လုံးတစ်ဝက်လောက် အထိထည့်ရတတ်ပါတယ်။

လက်နဲ့မမှေနိုင်လို့ ပင်ပန်းတယ်ဆိုရင်လည်း Blander ထဲကို ကြက်ဥ၊ သံပုရာ၊ ရှာလကာ၊ Mustard၊ ဆား၊ ငရုတ်ကောင်း တစ်ခါတည်းအကုန်ထည့်ပြီးမှေပါ။ ပြီးရင်တော့ ပထမဆုံးအနေနဲ့ ဆီတစ်ဇွန်းစာလောက် ထည့်ပြီးမှေနေပါ သမလောက်ပြီဆိုရင်တော့ ဆီကိုကွက်မြီးတန်းလောက်လေးနဲ့ ဖြည်းဖြည်းချင်းထည့်ပေးရင်း အပြစ်အကျဲအခြေအနေ အနေတော်ရင် ဆီထည့်ရပ်လိုက်လို့ရပါပြီ ပိုသမသွားအောင်တော့ အချိန်နည်းနည်းလောက် Blander ကိုဆက်ဖွင့်ထားပေးပါ။

Mayonnaise ကိုရေခဲသေတ္တာထဲမှာ လေလုံတဲ့ဘူးနဲ့ထည့်ပြီး သိမ်းထားလို့ရပါတယ် ၃-၄ ရက်လောက်အထိ ခံပါတယ်။ ကိုယ်တိုင်လုပ်ကြည့်ပါ ခက်ခက်ခဲခဲလည်းမဟုတ်သလို ပစ္စည်းတွေလည်း ထွေထွေထူးထူးမလိုအပ်လှပါဘူး။ ပြီးရင်တော့ ဆိုင်ကဝယ်တဲ့ Mayonnaise နဲ့ယှဥ်ပြီးစားကြည့်ပါဦး လတ်လတ်ဆတ်ဆတ် လုပ်ထားတဲ့ Mayonnaise ကပိုကောင်းကြောင်း သိသာပါလိမ့်မယ် နောက်ပြီးတော့ ကြာရှည်ခံအောင်လုပ်ထားတဲ့ Chemical လည်းတစ်ခုမှ မပါဘူးလေ။ လတ်လတ်ဆတ်ဆတ် Mayonnaise လေးလုပ်ကြည့်ကြပါဦးလား။

ဟိုတစ်ရက်က ကြက်ဥကို ပေါင်းပြီးချက်စားတယ် တစ်နေ့က ကြက်ဥကိုကြော်တယ် မနေ့က ကြက်ဥကိုပြုတ်ပြီး သုတ်စားတယ် ဒီနေ့တော့ ကြက်ဥကိုပြုတ်ပြီး ခရမ်းချဥ်သီးနဲ့ချက်စားတယ် မနက်ဖြန် ကြက်ဥကို ဘယ်လိုစားရမလဲစဥ်းစားတယ် ဒါနဲ့ပဲ ကြက်ဥအမျိုးမျိုးချက်နည်း ပြုတ်နည်း စဥ်စားမိသလောက် စာရင်းလုပ်ထားမိတယ် သိတဲ့လူများလည်း နာမည်လေးတွေ ပြောသွားကြပါဦးဗျာ ကြက်ဥချက်နည်း များများသိမှ ကျွန်တော်အဆင်ပြေမယ်။

(၁) ကြက်ဥကြော်
(၂) ကြက်ဥပြုတ်သုတ်
(၃) ကြက်ဥဖောက်ချက်
(၄) ကြက်ဥပြုတ်အချဥ်ချက်
(၅) ကြက်ဥပေါင်းချက်
(၆) သီးစုံဟင်းနဲ့ ကြက်ဥနဲ့ချက်
(ရ) ကြက်ဥစပယ်ရှယ်ကြော်ချက်

မနက်ဖြန်တော့ သီးစုံဟင်းနဲ့ ကြက်ဥချက်ရမလား ခက်တာက မဆလာပြတ်နေတယ်။ ကြက်ဥစပယ်ရှယ် လုပ်ရအောင်လည်း ကြက်ဥအနှစ်တွေက ပိုနေမယ် အဲဒါတွေ မရိုးနစ်လုပ်လိုက်ရအောင်လည်း ကိုယ်ကလည်း မရိုးနစ်သိပ်မကြိုက် မထူးပါဘူးမဆလာလေး ပြေးဝယ်ပြီး ကြက်ဥသီးစုံချဥ်ရည်လေးပဲ ချက်တာကောင်းပါတယ်။ နောက်နေ့မှ ကြက်ဥအမျိုးမျိုး တစ်ပါတ်စာ ချက်နည်းပြုတ်နည်း စိတ်ရှည်လက်ရှည်ရေးဦးမယ်။

လူပျိုကြီးများမှာ နေရတာတစ်ကာ မျက်နှာငယ်လှသည်။ သူ့ခမျာတစ်ယောက်တည်း မချက်တတ်မပြုတ်တတ် အစားဆင်းရဲရှာတယ်ဟု လူအများအတင်း တုတ်တတ်ကြသည်။ အမျိုးသမီးများသာ ချက်တတ်သည်ဟု မည်သူပြောသနည်း။ အမျိုးသမီးများ ချက်တတ်ပါသည်ဆိုလည်း အလွန်ဆုံးမိသားစုတစ်စု စားရုံသာချက်ပြုတ်ကြရသည်။ အလှူတွင်အမျိုးသမီး အိုးသူကြီးများ တစ်ခါမှမမြင်ဖူးပါ။

အိမ်ထောင်သည်များမှာလည်း တစ်ခါတစ်ယံ ဇနီးသည်မှ ခြိမ်းခြောက်ခြင်းကို ခံရတတ်သည်။ အမျိုးသမီးများက စိတ်ဆိုးသည့်အခါတိုင်း ထမင်းဟင်းချက်မကွေးခြင်း ဟင်းကိုမကြိုက်သည်များကိုသာ တမင်သက်သက် ချက်ကွေးခြင်းများဖြင့် နိုင်ရာနည်းဖြင့် နှိပ်စက်တတ်ကြသည်။

အမျိုးသားများအတွက်ရည်သန်ကာ လူပျိုကြီး၏ ချက်နည်းပြုတ်နည်း သင်ခန်းစာများကို လောကအလှ အွန်လိုင်းမဂ္ဂဇင်းတွင် စတင်ရေးသားနေပါသည်။ ပဏာမအနေဖြင့် ခုတ်နည်းထစ်နည်း ပါးပါးလှီးနည်းများကို စတင်ရေးသားနေပါပြီ။ မည်သူမဆို သွားရောက် ဖတ်ရှု့နိုင်ပါကြောင်း အသိပေးလိုက်ပါသည်။

http://www.lawka-ahla.com/news.php?item.790
http://www.lawka-ahla.com/news.php?item.792
http://www.lawka-ahla.com/news.php?item.793

ဒီနေ့တော့ ညနေပိုင်းစောစောစီးစီး အလုပ်ပြီးလို့ အိမ်ကိုအပြန် စျေးဝင်ဝယ်ပါတယ်။ အားတုံးလေး ကိုယ့်ဟာကိုယ် ချက်စားမယ်ပေါ့ဗျာ ဖြစ်ချင်တော့ ဆိုင်မှာက Pasta တွေရော Spaghetti တွေရော တစ်ကျပ် ဆယ်ပြားနဲ့စျေးချနေတာနဲ့ တစ်ထုပ်ဆိုရင် အနည်းဆုံး ၃ ခါလောက်တော့ စားရတယ်ဆိုပြီး တွက်ခြေကိုက်လို့ Speghetti တစ်ထုပ်ရယ် Fusilli Pasta တစ်ထုပ်ရယ်ဝယ်လာလိုက်တယ်။ နောက်တော့ ဟင်းအနှစ်လည်း ချက်ရမှာ ပျင်းလို့ဆိုပြီး Pasta Tomato တစ်ဘူးလည်း တစ်ခါတည်း ဝယ်လိုက်တယ်။
read more »

ရေးစရာမရှိတော့ ဟင်းချက်နည်း ရေးလိုက်ဦးမယ်။ ကိုဒီဘီစကားကို အငှားသုံးရရင်တော့ ဆားချက်ပေါ့ဗျာ။ ဟင်းချက်နည်း စာအုပ်ကိုဖတ်မယ်ဆိုရင် ပထမဆုံးသူတို့ အခေါ်အဝေါ်တွေကို နားလည်မှ ဖတ်လို့ရတယ်ဗျ။ ဗမာပြည်က ဦးကြီးပု စာအုပ်ဆိုရင်တော့ မလိုဘူးပေါ့ဗျာ။ ပထမဆုံး မဖြစ်မနေတွေ့ရတာကတော့ အသားတွေကို မချက်ခင်မှာ ပြင်တာဆင်တာကို သူတို့က အသေးစိတ်မပြောတော့ပဲ သူတို့ အခေါ်အဝေါ်တွေကိုပဲ သုံးလေ့ရှိတယ်။ ဒါကြောင့်တစ်ခါတစ်လေ စာအုပ်ဆိုင်ကနေ တွေ့တဲ့ ဟင်းချက်နည်း စာအုပ်တွေက ဖတ်ကြည့်လည်း ဘာလုပ်ရမှန်းမသိတာပါ။
read more »